Bålforbod
Statsforvalteren i Agder
Brannvesena i Agder åtvarar mot høg fare for skog- og utmarksbrann som følgje av langvarig tørke og lite nedbør. Sjølv ein liten gnist kan vere nok til å utløyse ein brann som raskt kan spreie seg.
Statsforvaltaren i Agder oppmodar alle som ferdast i skog og utmark til å vise stor aktsemd og følgje råda frå brannvesenet:
- Ikkje bruk open eld i eller nær skog og utmark.
- Unngå bruk av bålpanner, eingongsgrillar og anna utstyr som kan skape varme eller gnistar. Dette gjeld òg på etablerte bål- og grillplassar i utmarksområde, som til dømes Hove i Arendal.
- Ver ekstra forsiktig ved bruk av maskiner, verktøy og køyretøy i tørre område.
- Kast aldri sigarettsneipar eller fyrstikker i naturen.
- Meld frå med ein gong til naudnummer 110 dersom du ser røyk eller brann.
– Det generelle bålforbodet gjeld fram til 15. september. Med den tørre perioden vi er inne i no, er det viktig at alle tek ansvar og viser ekstra aktsemd for å redusere risikoen for brann, seier fungerande fylkesberedskapssjef Trine Krossbekk.
Brannvesenet minner om at dei fleste skog- og utmarksbrannane skuldast menneskeleg aktivitet, og at ni av ti brannar kan førebyggjast.
Din eld – ditt ansvar. Saman kan vi redusere risikoen for store brannar og verne liv, natur og verdiar.
Nyheiter frå Statsforvalteren 24.07.2026: Stor skogbrannfare