Det har den siste tida kome nye avklaringar om kommunen sitt høve til å krevje eigenbetaling for tryggleiksalarm.
Kommunen har fram til no kravd betaling for tryggleiksalarm som ein del av tenestetilbodet. På bakgrunn av dei nye avklaringane vil kommunen no gå gjennom ordninga og vurdere betalinga for den enkelte brukar.
Det er avklart at kommunen ikkje kan krevje eigenbetaling for tryggleiksalarm når alarmen er ein del av nødvendige helse- og omsorgstenester som kommunen har plikt til å tilby utan eigenbetaling. I andre tilfelle kan det, etter ei konkret vurdering, vere høve til å krevje betaling.
Kva betyr dette for deg?
Kommunen vil gå gjennom vedtaket ditt om tryggleiksalarm og vurdere kva behov alarmen er tildelt for. Du treng ikkje å sende inn ein ny søknad.
- Dersom vurderinga viser at kommunen ikkje kan krevje betaling for tryggleiksalarmen din, vil innkrevjinga bli avslutta.
- Dersom kommunen etter vurderinga kjem fram til at det framleis er høve til å krevje betaling, vil du få informasjon om dette og om grunnlaget for betalinga.
- Kommunen vil også vurdere tidlegare innbetalingar i samband med gjennomgangen.
Det er på noverande tidspunkt ikkje teke stilling til om eventuell tilbakebetaling skal skje. Dersom gjennomgangen viser at det er grunnlag for tilbakebetaling, vil kommunen informere deg særskilt om dette.
Du treng ikkje gjere noko no
Du treng ikkje å sende inn ny søknad eller ta kontakt med kommunen no. Kommunen vil ta kontakt dersom det er behov for ytterlegare opplysningar.
Vi beklagar eventuelle ulemper endringa kan føre til, og takkar for forståinga medan kommunen går gjennom ordninga.